AsiaUrdu AsiaUrdu eNews

ایشیا اردو

 جنوبی پنجاب میں ادویات ساز کمپنیوں نے مختلف ادویات کی سپلائی محدود کر دی ہے جس کو جواز بنا کر میڈیکل سٹورز مالکان نے ادویات کی بلیک مارکیٹنگ شروع کر دی ہے۔
جنوبی پنجاب میں ادویات ساز کمپنیوں نے مختلف ادویات کی سپلائی محدود کر دی ہے جس کی وجہ سے میڈیکل سٹوروں پر بلڈپریشر، شوگر اور دل کے امراض کی 55 ادویات دستیاب نہیں جن کی تلاش میں مریضوں کے لواحقین گھنٹہ گھر اور نشتر روڈ کی فارمیسیوں پر خوار ہورہے ہیں اور اسی لئے موجود ہ صورتحال کا فائدہ اٹھا کر بیشتر میڈیکل سٹورز مالکان نے نایاب ادویات کی قیمتیں ہی بڑھا دی ہیں جس کا مریضوں کے لواحقین نے نوٹس لینے کا مطالبہ کیا ہے۔
محکمہ صحت کے حکام کا موقف ہے کہ ادویات کی قیمتوں میں خود ساختہ اضافے سے مریضوں کے معاشی استحصال کا سلسلہ جاری ہے جس کو کنٹرول کرنے کے لئے کاروائیوں کا دائرہ کار وسیع کر دیا ہے۔
جنوبی پنجاب میں ڈرگ کنٹرول انسپکٹرزکے تبادلوں کے باوجود کاروائیوں کے حوالے سے صورتحال جوں کی توں ہے جس کی وجہ سے مہنگی ادویات خریدنا مریضوں کے لواحقین کے لئے مشکل ہو گیا ہے۔