AsiaUrdu AsiaUrdu eNews

فرانسیسی وزیر برائے ڈیجیٹل کا کہنا ہے کہ ایپل اپنے آئی فون 12 سے خارج ہونے والی تابکاری شعاعوں کے مسئلے کو دور کرنے کیلئے اپنے آئی فون 12 کو اپ ڈیٹ کرے گا۔
عالمی میڈیا رپورٹس کے مطابق جین نوئیل بیرٹ نے کہا کہ ایپل آنے والے دنوں میں فرانس میں آئی فون 12 کے صارفین کیلئے سافٹ ویئر اپ ڈیٹ فراہم کرے گا۔
فرانس میں آئی فون 12 کی فروخت اس وقت روک دی گئی جب ملک کے ریڈیو فریکوئینسی ریگولیٹر (ANFR) کو ڈیوائس سے بہت زیادہ برقی مقناطیسی تابکاری شعاعوں کے اخراج کا پتہ چلا، جس کے بعد ایپل کو اس مسئلے کو حل کرنے کیلئے کہا گیا۔
یہ بھی پڑھیں:فرانس کا ایپل کو آئی فون 12 کی فروخت روکنے کا حکم
ایپل کا اس حوالے سے کہنا تھا کہ نئی اپ ڈیٹ صرف فرانس کے صارفین پر لاگو ہوگی جہاں ایک مخصوص ٹیسٹنگ پروٹوکول موجود ہے، ایپل نے یہ بھی وضاحت پیش کی کہ تابکاری ٹیسٹنگ نظام کا نتیجہ ہے اور یہ صحت کے لحاظ سے کوئی تشویش کی بات نہیں ہے۔
فرانسیسی وزیر کا مزید کہنا تھا کہ ریگولیٹر آئی فون 12 کو ملک میں دوبارہ فروخت کی اجازت دینے سے پہلے حکم کی تعمیل میں کی گئی نئی اپ ڈیٹ کی جانچ کرے گا۔
واضح رہے کہ منصوبہ بند اپ ڈیٹ ایپل کے آئی فون 12 سے متعلق خدشات پیدا کرتا ہے جو دوسرے ممالک میں ابھی تک استعمال ہو رہا ہے۔