AsiaUrdu

چیئرمین پاکستان پیپلز پارٹی بلاول بھٹو زرداری نے اعلان کیا ہے کہ کراچی میں پبلک پرائیویٹ پارٹنرشپ کے تحت پہلی بندرگاہ (کیٹی پورٹ) بنائی جائے گی۔

کراچی میں شاہراہ بھٹو کی افتتاحی تقریب سے خطاب کرتے ہوئے انہوں نے کہا کہ کراچی کے لوگ ملک بھر سے یہاں آنا چاہتے ہیں کیونکہ شہر میں بڑے پیمانے پر ترقیاتی کام جاری ہیں۔ انہوں نے دعویٰ کیا کہ این آئی سی وی ڈی میں عالمی معیار کے مطابق مفت علاج فراہم کیا جا رہا ہے اور ملک بھر سے مریض یہاں آ رہے ہیں۔

بلاول بھٹو نے کہا کہ 2008 کے بعد کراچی میں ریکارڈ ترقیاتی منصوبے مکمل کیے گئے ہیں، جن میں شاہراہ فیصل اور لیاری ایکسپریس وے جیسے منصوبے شامل ہیں۔ ان کے مطابق تھر کول منصوبے سمیت کئی ترقیاتی پراجیکٹس پیپلز پارٹی کے دور حکومت میں مکمل ہوئے۔

انہوں نے کہا کہ حکومت محدود وسائل کے باوجود عوام کو ریلیف دینے کی کوشش کر رہی ہے، جن میں کسان کارڈ، موٹرسائیکل سبسڈی اور ماہی گیروں کے لیے ریلیف شامل ہیں۔

چیئرمین پیپلز پارٹی نے کہا کہ کراچی پاکستان کا اہم معاشی مرکز ہے اور یہاں سندھ فنانشل سینٹر بنانے کی ضرورت ہے تاکہ عالمی سطح پر مقابلہ کیا جا سکے۔ انہوں نے کہا کہ پبلک پرائیویٹ پارٹنرشپ کے ذریعے بڑے منصوبے مکمل کیے جائیں گے۔

انہوں نے مزید کہا کہ کیٹی بندر پورٹ منصوبہ ٹھٹھہ، سجاول اور بدین کے عوام کی زندگیوں میں بہتری لائے گا اور کراچی کو صنعتی و تجارتی مرکز کے طور پر مزید مضبوط کرے گا۔

بلاول بھٹو نے سیاسی مخالفین پر تنقید کرتے ہوئے کہا کہ اختلاف کے بجائے مل کر ملک کی ترقی کے لیے کام کرنا چاہیے، کیونکہ موجودہ حالات میں معاشی استحکام سب سے اہم ضرورت ہے۔