AsiaUrdu

گوگل نے اپنے اے آئی پلیٹ فارم جیمنائی میں نیا اور جدید فیچر متعارف کرا دیا ہے جس کے ذریعے صارفین اپنی پسند اور دلچسپی کے مطابق آسانی سے تصاویر تیار کر سکیں گے۔

کمپنی کے مطابق یہ فیچر "نانو بنانا" ٹیکنالوجی پر مبنی ہے، جو صارف کی ضروریات کو بہتر طور پر سمجھ کر خودکار انداز میں تصاویر تخلیق کرتا ہے۔ اس کے لیے اب تفصیلی ہدایات لکھنے کی ضرورت نہیں ہوگی، بلکہ مختصر اور سادہ جملوں سے بھی مطلوبہ تصویر بنائی جا سکے گی۔

مثال کے طور پر صارف "میرا ڈریم ہاؤس بنائیں" لکھے گا تو جیمنائی اس کی ترجیحات اور سابقہ ڈیٹا کو مدنظر رکھتے ہوئے تصویر تیار کرے گا۔ اسی طرح یہ سسٹم گوگل فوٹوز سمیت دیگر سروسز کے ڈیٹا سے بھی مدد لیتا ہے تاکہ ذاتی نوعیت کی تصاویر بہتر انداز میں بنائی جا سکیں۔

گوگل کے مطابق ہر تصویر کے ساتھ ایک "سورس" آپشن بھی موجود ہوگا جس سے صارف جان سکے گا کہ تصویر کس طرح تیار کی گئی ہے۔ تاہم کمپنی نے خبردار کیا ہے کہ بعض اوقات اے آئی صارف کے تناظر کو درست طور پر نہ سمجھ سکے، اس لیے فیڈ بیک کا آپشن بھی دیا گیا ہے۔

یہ نیا فیچر ابتدائی طور پر امریکا میں جیمنائی پلس، پرو اور الٹرا صارفین کے لیے دستیاب ہوگا، جبکہ مستقبل میں اسے دیگر ممالک اور کروم ڈیسک ٹاپ پر بھی متعارف کرایا جائے گا۔