AsiaUrdu

ایرانی وزارت خارجہ کے ترجمان اسماعیل بقائی نے امریکا اور ایران کے درمیان ممکنہ معاہدے سے متعلق خبروں کی تردید کرتے ہوئے کہا ہے کہ کسی بھی مفاہمتی یادداشت یا معاہدے پر کل دستخط نہیں ہوں گے۔

انہوں نے واضح کیا کہ اتوار کے روز بھی امریکا اور ایران کے درمیان کسی معاہدے پر دستخط کا کوئی امکان نہیں اور اس وقت جوہری معاملے پر کسی قسم کی بات چیت بھی زیر غور نہیں ہے۔

اسماعیل بقائی کے مطابق جنگ کے خاتمے پر توجہ مرکوز کرنے والے اسلام آباد میمورنڈم پر عمل جاری ہے، تاہم دستخط کے لیے حتمی وقت کا تعین ابھی نہیں کیا گیا۔ انہوں نے کہا کہ اس حوالے سے درست وقت کا انتظار کیا جا رہا ہے اور یہ عمل فوری طور پر مکمل نہیں ہوگا۔

ایرانی ترجمان نے مزید کہا کہ آنے والے دنوں میں معاہدے پر دستخط کے امکانات کو مکمل طور پر رد نہیں کیا جا سکتا، لیکن دوسرے فریق کی غیر یقینی صورتحال کے باعث اس بارے میں حتمی رائے دینا قبل از وقت ہے۔

انہوں نے اس بات پر بھی زور دیا کہ اس حساس معاملے پر غیر ضروری قیاس آرائیوں سے بچنے کے لیے محتاط انداز میں بیانات دینا ضروری ہے۔