AsiaUrdu

کراچی: کراچی کے علاقے گلستانِ جوہر میں سچل رینجرز ہیڈکوارٹر کے قریب ہفتہ کی شب دھماکے اور فائرنگ کا واقعہ پیش آیا، جس کے نتیجے میں ابتدائی اطلاعات کے مطابق متعدد افراد زخمی ہوئے ہیں، جبکہ سکیورٹی فورسز نے علاقے کو گھیرے میں لے کر سرچ اور تحقیقات کا آغاز کر دیا ہے۔

عینی شاہدین کے مطابق واقعہ گلستانِ جوہر بلاک 5 میں پیش آیا، جہاں پہلے زور دار دھماکے کی آواز سنی گئی، جس کے بعد وقفے وقفے سے فائرنگ کا سلسلہ جاری رہا۔ واقعے کے باعث علاقے میں خوف و ہراس پھیل گیا اور شہری محفوظ مقامات کی جانب منتقل ہونے لگے۔

ریسکیو 1122 کے ترجمان کے مطابق اطلاع ملتے ہی امدادی ٹیمیں فوری طور پر جائے وقوعہ پر روانہ کی گئیں۔ ریسکیو حکام کا کہنا ہے کہ ابتدائی طور پر تین افراد کے زخمی ہونے کی اطلاعات موصول ہوئی ہیں، جن میں دو رینجرز اہلکار بھی شامل ہیں، جنہیں طبی امداد کے لیے ہسپتال منتقل کر دیا گیا ہے۔

ریسکیو 1122 کے چیف ایگزیکٹو آفیسر ڈاکٹر عابد جلال، جو موقع پر موجود تھے، کے مطابق ابتدائی معلومات سے معلوم ہوا ہے کہ رینجرز دفتر پر پہلے دستی بم پھینکا گیا، جس کے بعد فائرنگ شروع ہوئی۔ تاہم واقعے کی نوعیت اور تمام حقائق کا تعین تحقیقات مکمل ہونے کے بعد ہی ممکن ہوگا۔

واقعے کے بعد قانون نافذ کرنے والے اداروں نے علاقے میں سکیورٹی سخت کر دی ہے، داخلی اور خارجی راستوں کی نگرانی بڑھا دی گئی ہے اور شواہد اکٹھے کیے جا رہے ہیں۔ حفاظتی اقدامات کے پیش نظر عام شہریوں کو جائے وقوعہ کے قریب جانے سے روک دیا گیا ہے۔

دریں اثنا سندھ حکومت کے ترجمان کے مطابق وزیراعلیٰ سندھ سید مراد علی شاہ نے واقعے کا فوری نوٹس لیتے ہوئے پولیس سے تفصیلی رپورٹ طلب کر لی ہے اور ہدایت کی ہے کہ واقعے کی نوعیت کا جلد از جلد تعین کرتے ہوئے ذمہ دار عناصر کے خلاف قانون کے مطابق کارروائی کی جائے۔

ایک شدت پسند گروہ نے اس حملے کی ذمہ داری قبول کرنے کا دعویٰ کیا ہے، تاہم اس دعوے کی سرکاری طور پر تصدیق نہیں ہوئی۔ حکام کا کہنا ہے کہ تمام پہلوؤں سے تحقیقات جاری ہیں اور مصدقہ معلومات سامنے آنے پر عوام کو آگاہ کیا جائے گا۔