AsiaUrdu

لاہور کے علاقے لیاقت آباد میں خاتون ٹیچر سے مبینہ اجتماعی زیادتی کے کیس میں پولیس نے اسکول کے سکیورٹی گارڈ سمیت دو ملزمان کو گرفتار کر لیا ہے۔

ایس پی ماڈل ٹاؤن اسد علی کے مطابق گرفتار ملزمان میں اسکول کا سکیورٹی گارڈ محسن اور اس کا ساتھی اسد شامل ہیں۔

پولیس کے مطابق ابتدائی تحقیقات میں انکشاف ہوا ہے کہ ملزم سکیورٹی گارڈ خاتون ٹیچر کو چھٹی کے بعد ورغلا کر اپنے دوست کے گھر لے گیا، جہاں مبینہ طور پر دونوں ملزمان نے خاتون کو نشہ آور چیز پلا کر زیادتی کا نشانہ بنایا۔

پولیس کا کہنا ہے کہ متاثرہ خاتون کو ہوش آنے پر ملزمان موقع سے فرار ہو گئے۔

متاثرہ خاتون کے والد کی مدعیت میں دونوں ملزمان کے خلاف مقدمہ درج کر لیا گیا ہے، جبکہ ملزمان کو گرفتار کر کے مزید تفتیش جاری ہے۔

ایس پی اسد علی کا کہنا ہے کہ خواتین کے ساتھ جرائم میں ملوث عناصر کے ساتھ کوئی رعایت نہیں برتی جائے گی اور ملزمان کو قانون کے مطابق سخت سزا دلانے کے لیے تمام قانونی تقاضے پورے کیے جائیں گے۔