AsiaUrdu

میرپورخاص کے کریم ٹاؤن میں سکول ٹیچر کے گھر فائرنگ کے افسوسناک واقعے میں 24 سالہ بیٹی جاں بحق ہوگئی جبکہ فائرنگ کرنے والے مبینہ حملہ آور نے بھی خود کو گولی مار کر ہلاک کرلیا۔

پولیس کے مطابق واقعہ فیضانِ مدینہ مرکز کے قریب رہائش پذیر سکول ٹیچر مانک لغاری کے گھر پیش آیا، جہاں فائرنگ کے نتیجے میں ان کی 24 سالہ بیٹی سویرا موقع پر ہی دم توڑ گئی۔

فائرنگ کے دوران مقتولہ کی 50 سالہ والدہ بھی گولی لگنے سے شدید زخمی ہوگئیں، جنہیں فوری طبی امداد کے لیے ہسپتال منتقل کردیا گیا۔

پولیس کے مطابق فائرنگ کے مبینہ حملہ آور کی شناخت 22 سالہ فیضان کے نام سے ہوئی ہے، جس نے واقعے کے بعد مبینہ طور پر خود کو گولی مار کر زندگی کا خاتمہ کرلیا۔

پولیس نے جاں بحق افراد کی لاشیں سول ہسپتال منتقل کردی ہیں جبکہ واقعے کی وجوہات اور دیگر پہلوؤں سے متعلق مزید تحقیقات جاری ہیں۔