AsiaUrdu

اسلام آباد: وفاقی وزیر برائے پیٹرولیم علی پرویز ملک نے کہا ہے کہ اگر حکومت پیٹرولیم مصنوعات کی قیمتیں کم رکھتی ہے تو عوام اپنے لائف سٹائل (طرزِ زندگی) میں تبدیلی نہیں لائیں گے۔ ایک نجی ٹی وی پروگرام میں گفتگو کرتے ہوئے انہوں نے واضح کیا کہ ملک کو درپیش معاشی چیلنجز اور عالمی مارکیٹ کی صورتحال کے تناظر میں سخت فیصلے ناگزیر ہو چکے ہیں۔

وفاقی وزیر کا کہنا تھا کہ ایران کی حالیہ صورتحال نے پورے خطے کو اپنی لپیٹ میں لے لیا ہے، جس کے باعث ہمیں کسی بھی ہنگامی صورتحال کے لیے تیار رہنا ہوگا۔ انہوں نے بتایا کہ حکومت نے خام تیل کی سپلائی برقرار رکھنے کے لیے متبادل انتظامات کر رکھے ہیں تاکہ ملک میں توانائی کا بحران پیدا نہ ہو۔ ان کا مزید کہنا تھا کہ وزیراعظم کی ہدایت پر تمام صوبوں کو اعتماد میں لے کر وفاقی سطح پر کفایت شعاری مہم کا آغاز کر دیا گیا ہے تاکہ معیشت کو استحکام کی جانب لے جایا جا سکے۔