AsiaUrdu

بلوچستان کے مختلف ہسپتالوں میں ایمرجنسی سروسز کے علاوہ دیگر تمام طبی سہولیات کا بائیکاٹ کیا گیا جس سے مریضوں کو مشکلات کا سامنا کرنا پڑا۔کوئٹہ میں تیزاب گردی کے واقعہ کے خلاف ینگ ڈاکٹرز نے شدید احتجاج کرتے ہوئے ہڑتال کی۔

ینگ ڈاکٹرز نے شہر میں احتجاجی ریلی بھی نکالی، جس میں مظاہرین نے سیکرٹری صحت بلوچستان اور سول ہسپتال کے ایم ایس کے خلاف نعرے لگائے۔ ڈاکٹرز نے مطالبہ کیا کہ انہیں مکمل سکیورٹی فراہم کی جائے تاکہ ایسے واقعات سے بچا جا سکے۔

مظاہرین نے سیکرٹری صحت، ایم ایس اور سکیورٹی انچارج سول ہسپتال کو معطل کرنے کا مطالبہ بھی کیا۔ دوسری جانب معاون برائے داخلہ بابر یوسفزئی نے کہا کہ وزیراعلیٰ بلوچستان کوئٹہ پہنچتے ہی ڈاکٹروں سے ملاقات کریں گے اور ان کے جائز مطالبات کو تسلیم کیا جائے گا۔

تیزاب گردی کا نشانہ بننے والی ڈاکٹر ماہ نور کی ابتدائی طبی رپورٹ کے مطابق ان کی حالت خطرے سے باہر ہے اور وہ اس وقت کراچی کے ایک نجی ہسپتال میں زیر علاج ہیں۔

ادھر وزیراعلیٰ بلوچستان نے بہادری کا مظاہرہ کرتے ہوئے لیڈی ڈاکٹر کی جان بچانے والے عبدالرزاق ترکئی کے لیے سول ایوارڈ کا اعلان بھی کیا ہے۔