AsiaUrdu

امریکی صدر ڈونلڈ ٹرمپ نے ایران کو سخت الفاظ میں خبردار کرتے ہوئے کہا ہے کہ اگر اس نے اپنے رویے سے سبق نہ سیکھا تو اسلامی جمہوریہ ایران کا وجود خطرے میں پڑ سکتا ہے۔

سوشل میڈیا پلیٹ فارم ٹروتھ سوشل پر جاری اپنے بیان میں صدر ٹرمپ نے دعویٰ کیا کہ امریکہ نے ایران میں میزائل اور ڈرون ذخیرہ کرنے والی تنصیبات اور ساحلی ریڈار سائٹس کو نشانہ بنایا ہے۔

انہوں نے کہا کہ یہ کارروائی ایران کی جانب سے جنگ بندی معاہدے کی خلاف ورزی کے جواب میں کی گئی، اور امریکی فضائیہ نے حالیہ حملوں میں ان مقامات کو نشانہ بنایا جہاں میزائل اور ڈرون محفوظ کیے جاتے تھے۔

صدر ٹرمپ کے مطابق ایران بار بار جنگ بندی کی خلاف ورزی کر رہا ہے اور ممکن ہے کہ وہ کبھی سبق نہ سیکھے، جس کے باعث امریکہ کو مزید سخت اقدامات کرنا پڑ سکتے ہیں۔

انہوں نے مزید کہا کہ اگر صورتحال یہی رہی تو ایسا وقت آ سکتا ہے جب امریکہ مزید تحمل کا مظاہرہ نہیں کرے گا اور اپنی کارروائی کو مکمل کرنے کے لیے فوری قدم اٹھائے گا، جس کے نتیجے میں ایران کے وجود کو شدید خطرات لاحق ہو سکتے ہیں۔