9 مئی کے ایک اور مقدمہ کا فیصلہ، پی ٹی آئی کے اہم رہنماؤں کو 10 سال قید کی سزا، شاہ محمود پھر بری
لاہور: انسدادِ دہشت گردی عدالت (ATC) کے جج منظر علی گل نے کوٹ لکھپت جیل میں 9 مئی کے پرتشدد واقعات سے متعلق ایک اور اہم مقدمے کا حتمی فیصلہ سنا دیا ہے۔ عدالت نے پاکستان تحریک انصاف (پی ٹی آئی) کے سینیئر رہنماؤں ڈاکٹر یاسمین راشد، سابق گورنر پنجاب عمر سرفراز چیمہ، میاں محمود الرشید اور سینیٹر اعجاز چوہدری کو جرم ثابت ہونے پر 10، 10 سال قیدِ بامشقت کی سزا سنائی ہے۔ دوسری جانب، عدالت نے اسی کیس میں نامزد پی ٹی آئی کے وائس چیئرمین اور سابق وزیر خارجہ شاہ محمود قریشی کو مقدمے سے بری کرنے کا حکم جاری کیا ہے۔
یہ فیصلہ 9 مئی کو لاہور کے علاقے مغلپورہ میں پولیس کی گاڑیاں جلانے، جلاؤ گھیراؤ اور توڑ پھوڑ کے الزامات کے تحت درج مقدمے میں سنایا گیا ہے۔ اس کیس کا باقاعدہ ٹرائل کوٹ لکھپت جیل کے اندر قائم خصوصی عدالت میں چلایا گیا، جہاں پراسکیوشن کی جانب سے پیش کیے گئے تمام 37 گواہوں کے بیانات پر جرح کا عمل مکمل کیا گیا۔ چالان کے مطابق، ڈاکٹر یاسمین راشد سمیت مجموعی طور پر 22 ملزمان کے خلاف کارروائی شروع کی گئی تھی، جس میں سے دورانِ ٹرائل عدالت نے دو ملزمان ارباز زمان اور الٰہی بخش کو مسلسل غیر حاضری پر اشتہاری قرار دیا۔ عدالت نے تمام شواہد اور بیانات کا جائزہ لینے کے بعد مجموعی طور پر 15 ملزمان کے حوالے سے اپنا حتمی فیصلہ صادر کیا۔
Leave A Comment