AsiaUrdu

ڈیرہ غازی خان کے علاقے تونسہ شریف میں سکیورٹی پر مامور چوکس پولیس اہلکاروں نے اپنی جانوں کا نذرانہ دے کر فتنہ الخوارج کے دہشت گردوں کا ایک بڑا اور ہولناک خودکش حملہ ناکام بنا دیا ہے، کارروائی کے دوران 3 دہشت گرد ہلاک ہو گئے جبکہ تونسہ پولیس کے 2 جوانوں نے جامِ شہادت نوش کیا۔

ذرائع کے مطابق تونسہ شریف میں واقع جھنگی سکیورٹی چیک پوسٹ پر فتنہ الخوارج سے تعلق رکھنے والے ایک خودکش بمبار نے بارود سے بھری گاڑی کے ذریعے چیک پوسٹ کو اڑانے کی مذموم کوشش کی۔ چیک پوسٹ پر تعینات انتہائی الرٹ پولیس اہلکاروں نے مشکوک گاڑی کو دیکھتے ہی فوری اور بروقت کارروائی کی اور حملہ آور کو ایک محفوظ فاصلے پر ہی روک کر فائرنگ شروع کر دی۔

شدید فائرنگ کے تبادلے اور گاڑی میں موجود بارودی مواد پھٹنے کے نتیجے میں حملہ آور سمیت 3 دہشت گرد موقع پر ہی ہلاک ہو گئے۔ اس وطن عزیز کے دفاع کی اس جرات مندانہ کوشش میں 2 پولیس اہلکار فرائض کی ادائیگی کے دوران شہید ہو گئے، جبکہ متعدد اہلکار زخمی ہوئے ہیں۔ واقعے کی اطلاع ملتے ہی بھاری نفری اور امدادی ٹیمیں جائے وقوعہ پر پہنچ گئیں، زخمیوں کو فوری طور پر طبی امداد کے لیے اسپتال منتقل کر دیا گیا ہے۔ سکیورٹی فورسز نے علاقے کو گھیرے میں لے کر ممکنہ سہولت کاروں کی تلاش کے لیے بڑے پیمانے پر سرچ آپریشن کا آغاز کر دیا ہے۔