AsiaUrdu

وسطی افریقی ملک کانگو میں ایبولا وائرس کی وبا شدت اختیار کر گئی ہے جس کے باعث اب تک 80 افراد ہلاک ہو چکے ہیں۔

افریقا سینٹر فار ڈیزیز کے مطابق کانگو کے صوبے ایتوری میں صورتحال تشویشناک ہے اور اب تک 246 مشتبہ کیسز سامنے آئے ہیں۔

رپورٹس کے مطابق وبا مشرقی کانگو کے مونگوالو اور روامپارا ہیلتھ زونز میں زیادہ پھیل رہی ہے، جو یوگنڈا اور جنوبی سوڈان کی سرحدوں کے قریب واقع ہیں۔

حکام نے خدشہ ظاہر کیا ہے کہ اگر بروقت اقدامات نہ کیے گئے تو یہ وائرس سرحدی ممالک تک بھی پھیل سکتا ہے۔ اسی دوران ہمسایہ ملک یوگنڈا میں بھی ایبولا سے ایک ہلاکت کی تصدیق کی گئی ہے۔

ماہرین صحت نے صورتحال کو خطرناک قرار دیتے ہوئے متاثرہ علاقوں میں نگرانی اور حفاظتی اقدامات مزید سخت کرنے پر زور دیا ہے۔