AsiaUrdu

وفاقی وزیر منصوبہ بندی احسن اقبال نے کہا ہے کہ ترقی کا واحد راستہ تعلیم ہے اور نارووال تعلیمی میدان میں ایک اہم مرکز کے طور پر ابھر رہا ہے۔

ایک تقریب سے خطاب کرتے ہوئے انہوں نے کہا کہ تبدیلی کے نعرے لگانے والوں نے عوام کو صرف خواب دکھائے اور ملکی اداروں کے خلاف پروپیگنڈا کیا، جبکہ حقیقت میں عوام کو نقصان پہنچا۔

انہوں نے کہا کہ مسلم لیگ (ن) نے ملک کی ترقی کا سفر دوبارہ شروع کیا ہے اور مختلف ترقیاتی منصوبوں پر تیزی سے کام جاری ہے۔

احسن اقبال کے مطابق مریدکے روڈ کی تعمیر سے عوام کو بہتر سفری سہولیات میسر آئیں گی اور علاقے کی معاشی سرگرمیوں میں اضافہ ہوگا۔

انہوں نے مزید کہا کہ نارووال میڈیکل کالج نے پنجاب بھر میں پہلی پوزیشن حاصل کر کے ضلع کا نام روشن کیا ہے، جو تعلیمی میدان میں ایک بڑی کامیابی ہے۔