AsiaUrdu

عالمی منڈی: مشرق وسطیٰ میں جاری کشیدگی اور تیل کی سپلائی متاثر ہونے کے خدشات کے باعث عالمی منڈی میں خام تیل کی قیمتوں میں اضافے کا رجحان برقرار ہے۔ بدھ کی صبح ابتدائی کاروبار کے دوران برینٹ خام تیل اور امریکی ڈبلیو ٹی آئی دونوں کی قیمتوں میں اضافہ ریکارڈ کیا گیا۔

خبر رساں ادارے رائٹرز کے مطابق برینٹ خام تیل کی قیمت 89 سینٹ، یعنی 0.8 فیصد اضافے کے بعد 106.58 ڈالر فی بیرل ہوگئی، جبکہ امریکی ویسٹ ٹیکساس انٹرمیڈیٹ (WTI) خام تیل 80 سینٹ، یعنی 0.9 فیصد اضافے سے 94.94 ڈالر فی بیرل پر پہنچ گیا۔

اس سے قبل منگل کو کاروبار کے اختتام پر برینٹ خام تیل کی قیمت میں 0.9 فیصد کمی ہوئی تھی، جبکہ ڈبلیو ٹی آئی کی قیمت 0.4 فیصد بڑھ گئی تھی۔

رائٹرز کے مطابق سرمایہ کاروں کی توجہ یمن کے حوثیوں اور سعودی عرب کے درمیان لڑائی سے تیل کی عالمی رسد کو لاحق خطرات اور روس سے ڈیزل کی اضافی فراہمی کے امکانات پر مرکوز ہے۔ روس سے ڈیزل کی زیادہ دستیابی سپلائی پر دباؤ کم کرنے میں مدد دے سکتی ہے، تاہم مشرق وسطیٰ میں کشیدگی قیمتوں میں اتار چڑھاؤ کا باعث بن رہی ہے۔

دوسری جانب سعودی وزارتِ توانائی کے مطابق حوثیوں نے مشرقی شہر ظہران میں سرکاری تیل کمپنی سعودی آرامکو کی ایک انتظامی عمارت کو نشانہ بنایا، جس کے نتیجے میں محدود پیمانے پر آگ لگی۔ اس واقعے نے خطے میں توانائی کی اہم تنصیبات اور تیل کی سپلائی کے تحفظ سے متعلق خدشات کو مزید بڑھا دیا ہے۔