AsiaUrdu

ملک بھر میں پایا جانے والا سہانجنا یا مورنگا کا درخت طبی خصوصیات سے بھرپور ہے اور مختلف بیماریوں کے علاج کے لیے مفید سمجھا جاتا ہے۔ یہ بات اسسٹنٹ ڈائریکٹر محکمہ زراعت سمبڑیال، ڈاکٹر افتخار حسین بھٹی نے اے پی پی سے گفتگو کرتے ہوئے بتائی۔

انہوں نے کہا کہ سہانجنا نہ صرف پاکستان بلکہ جنوبی ایشیا، افریقہ، لاطینی امریکہ، مشرق وسطیٰ، بھارت، فلپائن، نائیجیریا، سوڈان اور تھائی لینڈ میں پایا جاتا ہے اور یہ انتہائی تیزی سے نشوونما پاتا ہے۔ آٹھ ماہ کے اندر یہ بڑا درخت بن جاتا ہے۔

ڈاکٹر بھٹی نے بتایا کہ اس کے پھول اور پھل سبزی کے طور پر پکائے اور کھائے جاتے ہیں، اور اسے اچار کے طور پر بھی استعمال کیا جاتا ہے۔ پاکستانی کئی علاقوں میں لوگ اسے شوق سے کھاتے ہیں اور مہمانوں کے لیے خصوصی طور پر دسترخوان پر رکھتے ہیں۔ انہوں نے کہا کہ کاشتکار اس کی کاشت کر کے اچھا منافع بھی حاصل کر سکتے ہیں۔