پشاور: سکول کی چھت گرنے سے 29 بچے اور خاتون ٹیچر جاں بحق، متعدد زخمی
پشاور: خیبرپختونخوا کے دارالحکومت پشاور کے علاقے دیر کالونی میں نجی اسکول کی چھت گرنے سے 29 بچوں اور ایک خاتون ٹیچر کے جاں بحق ہونے کی اطلاعات ہیں، جبکہ 52 بچے زخمی ہوگئے۔ حادثے کے بعد امدادی کارروائیاں کی گئیں اور اسکول کے مالک کو حراست میں لے لیا گیا۔
ریسکیو حکام کے مطابق واقعہ دیر کالونی کی کالج روڈ پر پیش آیا، جہاں اسکول کی چھت گرنے کے بعد متعدد بچے ملبے تلے دب گئے۔ اطلاع ملتے ہی امدادی ٹیمیں موقع پر پہنچیں اور زخمیوں کو اسپتال منتقل کیا گیا۔
لیڈی ریڈنگ ہسپتال کے ترجمان محمد عاصم کے مطابق زخمی بچوں کو فوری طبی امداد فراہم کی گئی، جبکہ بعض کی حالت تشویشناک بتائی گئی۔ جاں بحق بچوں کی عمریں 7 سے 13 سال کے درمیان بتائی گئی ہیں، جن میں بچیاں بھی شامل ہیں۔ واقعے کے بعد ہسپتال میں ایمرجنسی نافذ کردی گئی۔
ریسکیو حکام کے مطابق عمارت کی ایک چھت دوسری چھت پر گرنے سے مزید حصے متاثر ہوئے۔ اسکول کی عمارت تین منزلہ تھی اور تنگ گلیوں میں واقع ہونے کے باعث امدادی کارروائیوں میں مشکلات پیش آئیں۔
ایس ایس پی آپریشنز کے مطابق اسکول میں تقریباً 110 بچے زیر تعلیم تھے اور عمارت کی چھتیں خستہ حال تھیں۔ حکام نے بتایا کہ امدادی آپریشن مکمل کرلیا گیا ہے اور اسکول کے مالک کو حراست میں لے لیا گیا ہے۔ مالک کے خلاف مقدمہ درج کرنے کا بھی بتایا گیا ہے۔
ابتدائی رپورٹ میں عمارت کی خستہ حالی کا انکشاف
حادثے کی ابتدائی رپورٹ کے مطابق عمارت پہلے سے خستہ حال تھی۔ رپورٹ میں بتایا گیا کہ پہلے ایک کمرے کی چھت گری، جس کے بعد امدادی کارروائیوں کے دوران لوگوں کے جمع ہونے سے عمارت کے دیگر حصے بھی منہدم ہوگئے۔ رپورٹ کے مطابق اسکول میں بعض بچوں کے رہنے کا انتظام بھی تھا اور وہاں دینی و دنیاوی تعلیم دی جاتی تھی۔
ڈپٹی کمشنر پشاور نے واقعے کی تحقیقات کے لیے کمیٹی قائم کردی ہے اور ایک روز میں رپورٹ طلب کی گئی ہے تاکہ حادثے کی وجوہات اور ذمہ داری کا تعین کیا جاسکے۔
صدر، وزیراعظم اور دیگر رہنماؤں کا اظہار افسوس
صدر مملکت آصف علی زرداری نے حادثے میں بچوں اور اساتذہ کے جاں بحق اور زخمی ہونے پر گہرے دکھ اور افسوس کا اظہار کرتے ہوئے متاثرہ خاندانوں سے تعزیت کی۔
وزیراعظم شہباز شریف نے قیمتی جانوں کے ضیاع پر افسوس کا اظہار کیا اور زخمیوں کو بہترین ممکنہ طبی امداد فراہم کرنے کی ہدایت کی۔
گورنر خیبرپختونخوا فیصل کریم کنڈی نے بھی واقعے پر دکھ کا اظہار کرتے ہوئے متعلقہ حکام سے رپورٹ طلب کی اور حادثے کی وجوہات معلوم کرنے کی ہدایت کی۔
چیئرمین پیپلز پارٹی بلاول بھٹو زرداری، وزیراعلیٰ پنجاب مریم نواز اور وزیراعلیٰ سندھ مراد علی شاہ نے بھی افسوس کا اظہار کیا۔ مشیر اطلاعات خیبرپختونخوا ثمر ہارون بلور نے متاثرہ خاندانوں سے ہمدردی کا اظہار کرتے ہوئے زخمی بچوں کو بروقت طبی سہولیات فراہم کرنے کی ہدایت کی۔
پاک فوج کے اہلکاروں اور دیگر امدادی اداروں نے بھی ریسکیو کارروائیوں میں حصہ لیا اور ملبے سے بچوں اور اسکول عملے کو نکال کر اسپتال منتقل کرنے میں معاونت کی۔
Leave A Comment