AsiaUrdu

کوئٹہ کی ضلعی انتظامیہ نے سیکیورٹی صورتحال کے پیش نظر شہر کے مختلف پکنک پوائنٹس کو عارضی طور پر بند کر دیا ہے۔ ڈپٹی کمشنر مہراللہ بادینی کے مطابق یہ فیصلہ امن وامان کی موجودہ صورتحال کے باعث کیا گیا ہے۔

پابندی کے تحت ہنہ اُڑک، ہنہ جھیل، سرہ خلہ، کرخسہ، چلتن نیشنل پارک اور شعبان سمیت متعدد تفریحی مقامات پر عوام اور سیاحوں کے داخلے پر مکمل پابندی عائد کر دی گئی ہے۔

ضلعی انتظامیہ نے متعلقہ پولیس افسران اور عملے کو ہدایت دی ہے کہ اس پابندی پر سختی سے عملدرآمد کرایا جائے اور تفریح کی غرض سے آنے والے افراد کو واپس بھیجا جائے۔

انتظامیہ نے شہریوں سے اپیل کی ہے کہ وہ موجودہ حالات کو مدنظر رکھتے ہوئے حکومتی ہدایات پر عمل کریں اور انتظامیہ کے ساتھ مکمل تعاون کریں۔