AsiaUrdu

واشنگٹن میں امریکی کانگریس کے رکن الگرین نے پاکستان کے حق میں ایک قرارداد پیش کردی جس میں ایران اور امریکہ کے درمیان قیامِ امن کیلئے پاکستان کی سفارتی کوششوں کو خراج تحسین پیش کیا گیا ہے۔

قرارداد میں پاکستان کو ایک غیر جانبدار اور قابل اعتماد ثالث قرار دیتے ہوئے کہا گیا کہ پاکستان نے حساس صورتحال میں اہم سفارتی کردار ادا کیا۔ قرارداد کے متن کے مطابق اس تنازع کے باعث جانی نقصان، عوام کی بے دخلی اور عالمی سطح پر مالی دباؤ میں اضافہ ہوا، ایسے میں امن کیلئے پاکستان کی کوششیں قابل ستائش ہیں۔

امریکی رکن کانگریس الگرین نے کہا کہ جنگ اور انسانی تکالیف کے ماحول میں ان عناصر کو تسلیم کرنا ضروری ہے جو امن اور مذاکرات کیلئے کردار ادا کر رہے ہیں۔ انہوں نے کہا کہ پاکستان کا کردار اس بات کی یاد دہانی ہے کہ سفارت کاری مسائل کے حل کا مؤثر راستہ ہے۔

انہوں نے مزید کہا کہ ان کوششوں کو سراہ کر مذاکرات کو ترجیح دینے اور متاثرہ بے گناہ جانوں کے تحفظ کے عزم کو تقویت ملتی ہے۔