AsiaUrdu

کوٹ ادو کے نواحی علاقے قصبہ گجرات میں ایک آئل ٹینکر کے ٹینک سے دو نامعلوم افراد کی لاشیں برآمد ہونے کے بعد علاقے میں خوف و ہراس پھیل گیا۔ پولیس نے لاشیں تحویل میں لے کر پوسٹ مارٹم کے لیے ہسپتال منتقل کر دی ہیں جبکہ واقعے کی مختلف پہلوؤں سے تحقیقات جاری ہیں۔

پولیس کے مطابق نالہ جاکھڑی کے قریب منا ہوٹل پر کھڑے فوسل کمپنی کے آئل ٹینکر سے لاشوں کی موجودگی کی اطلاع ملتے ہی ایس ایچ او عمران گوپانگ پولیس کی بھاری نفری کے ہمراہ موقع پر پہنچ گئے۔ پولیس نے جائے وقوعہ سے شواہد اکٹھے کیے اور قانونی کارروائی کے بعد دونوں لاشوں کو ٹینک سے نکال کر ہسپتال منتقل کر دیا۔

ابتدائی تحقیقات کے مطابق دونوں افراد کی شناخت تاحال نہیں ہو سکی۔ پولیس اس بات کا تعین کرنے کی کوشش کر رہی ہے کہ دونوں افراد کی ہلاکت کن حالات میں ہوئی اور آیا یہ حادثاتی واقعہ ہے یا اس کے پیچھے کوئی مجرمانہ کارروائی کارفرما ہے۔

پولیس حکام کا کہنا ہے کہ واقعے کی ہر پہلو سے تحقیقات جاری ہیں، جبکہ فرانزک شواہد اور پوسٹ مارٹم رپورٹ کی روشنی میں مزید حقائق سامنے آنے کی توقع ہے۔