AsiaUrdu

پاکستان اور جنوبی کوریا کے درمیان چار میچوں کی ہاکی سیریز کے آخری میچ میں جنوبی کوریا نے پاکستان کو 2 کے مقابلے میں 6 گول سے شکست دے دی۔

جنوبی کوریا نے میچ کے آغاز ہی سے جارحانہ کھیل پیش کیا اور پہلے کوارٹر میں 2 گول کر کے برتری حاصل کر لی۔ تیسرے کوارٹر میں کورین ٹیم نے مزید 3 گول کیے جبکہ چوتھے کوارٹر میں ایک اور گول کر کے اسکور 6-2 کر دیا۔

پاکستان نے دوسرے اور تیسرے کوارٹر میں ایک، ایک گول اسکور کیا، تاہم قومی ٹیم خسارہ کم کرنے کے باوجود میچ میں واپسی نہ کر سکی۔

آخری میچ میں شکست کے باوجود پاکستان نے چار میچوں کی سیریز 3-1 سے اپنے نام کر لی۔ قومی ٹیم نے ابتدائی تین میچوں میں کامیابی حاصل کر کے سیریز پہلے ہی اپنے نام کر لی تھی۔

ہاکی مینجمنٹ نے مستقبل کی تیاری کو مدنظر رکھتے ہوئے آخری میچ میں انڈر 21 کھلاڑیوں کو بھی موقع دیا، تاکہ نوجوان کھلاڑیوں کو بین الاقوامی مقابلوں کا تجربہ حاصل ہو سکے۔