AsiaUrdu

پاکستان کرکٹ ٹیم کے آل راؤنڈر شاداب خان نے انگلینڈ کے خلاف چوتھے ون ڈے میچ میں حاصل ہونے والی کامیابی اپنی والدہ اور اہلیہ کے نام کر دی۔

سماجی رابطے کی ویب سائٹ ایکس پر جاری اپنے پیغام میں شاداب خان نے کہا کہ الحمدللہ، وہ یہ جیت اپنی زندگی کی دو بہترین خواتین، اپنی والدہ اور اہلیہ کے نام کرتے ہیں۔

شاداب خان نے قومی ٹیم کے فاسٹ بولر حارث رؤف کی بھی خصوصی تعریف کی۔ ان کا کہنا تھا کہ ٹیم کی کامیابی اجتماعی کوششوں کا نتیجہ ہوتی ہے اور حارث رؤف نے شراکت داری میں اس بات کو ثابت کیا۔ انہوں نے اپنی پوری ٹیم کا شکریہ بھی ادا کیا۔

واضح رہے کہ تین ملکی ون ڈے سیریز کے چوتھے میچ میں پاکستان نے انگلینڈ کو ایک وکٹ سے شکست دی۔ قذافی اسٹیڈیم لاہور میں کھیلے گئے میچ میں قومی ٹیم نے 242 رنز کا ہدف 48ویں اوور میں حاصل کیا۔

شاداب خان نے 113 رنز کی ناقابلِ شکست اننگز کھیلتے ہوئے اپنے ون ڈے کیریئر کی پہلی سنچری اسکور کی۔ انہوں نے حارث رؤف کے ساتھ آخری وکٹ پر 89 رنز کی اہم شراکت قائم کرکے پاکستان کو سنسنی خیز فتح دلانے میں کلیدی کردار ادا کیا۔